白雪堡壘

星期一晚上anson ba有約，於是他便湊anson坐巴士到我公司附近交收，然後我再帶anson坐巴士回家，他便可以輕鬆赴約去。
這是撈公單方面要出夜街的唯一方法，因為我沒有彈性收工時間，也沒有賓賓好幫手，老人家又被兩隻甲怪脅持著...
原本可以開車來回的，下班時間人多車迫，何必要大人細路齊齊擠沙甸魚罐？不過anson卻選擇坐巴士；但既然大人要勞碌細路以換取半晚的自由，那大人也好應該順應小孩意願，滿足孩子的遊車河慾望。

轉駁兩程巴士後，兩母子在村頂下車，手牽手慢步回家，路燈照著我們歸家的路；
我們的房子在中排，從大路穿進小路，拐個彎就可到達；
就在小窄路盡頭，彎位之處，兩母子踫上好久不見的大強三兄弟！！！！！

牠們一隻在我右手邊的牆壁上，是個只要我伸手便可跟強哥一號shake hand的火熱距離，二號在十步以內正正正中的地面上，三號在右面十五步後的圍牆上；
牠們呢個Ｚ字的隊形，令我完全束手無策，要是三位能稍為靠齊一點我尚可閉眼靠邊光速奔去開門上樓，但呢個情況，似乎衝向任何一邊都起碼會觸怒兩隻，等陣激到佢地「飛起」撲過來的話...............我.....................

正所謂敵不動我不動，雖然已是差不多晚上十時，兩母子依然企硬在原地；
母（晃動電筒照強）：「anson，有曱甴....mama好驚...」
子：「係啦...有曱甴....我都好驚...」
母（晃電筒驅強不果，孩子伸手接力）：「咁點算？mama真係唔敢返屋企...」
子（試圖學mama趕強）：「係啦我地返唔到屋企啦...」
母：「嗱anson，不如你上去踩死前面（二號）果隻先，咁我地之後應該可以返到屋企...」（可惡大強完全不怕電筒強光！）
子：「唔得丫...我好驚丫...」
母：「如果唔係我地返唔到屋企架啦...我示範你睇丫」（行前兩步胡亂踩踏）
母：「嗱...好簡單係咪？你試下啦...」
子：「咁..好啦..」
此時，anson慢慢鬆離拖著我的小手，一小步一小步的向前走，然後出腳--------------踩！！！
其實我無想過anson真會答應，從他的表情和冒汗程度，他的驚慌指數一定不比我低，看著他上前送死的小背影，我也分不清當時眼角的是汗水還是淚水...
子（快步退回來拖著mama）：「得啦！死左啦！」
母：「真係？」（蹲下查証）
子：「係呀！佢爛哂啦！」
我先擁著親吻和答謝anson，然後再三用電筒照看，從anson的腳法，我猜他其實未有踩中的，anson又怎夠大強快？
母：「anson....嗯.....佢......好似未死丫...」（因為二號的身體還頗3D的）
子：「死左啦...」
母：「嗯.....嗱咁.....我地今次分頭行事，你去踩多一次隻曱甴，mama就衝去開門，然後一齊跑返屋企好無？」
時間來到十時二十分，跟三位強哥苦苦對峙了差不多三十分鐘，兩母子已經渾身濕透，但仍然卡在無家可歸，呼救無門的環境裡...
子：「嗯...好！」
想不到anson再次答應，呢次我確實是騙他的，由始至終我沒打算要”衝去開門”，我只是想如果anson能先擊斃二號，應該可以把一號和三號嚇走吧？
anson又再鬆手，這次他快步衝前出腳--------------踩！！！這下可激怒二號了，牠發力向anson跑去，anson見狀便極速回頭喪跑回我懷中大喊：「丫！！！！！！！！好驚呀！！！！！」
兩母子退後了多少，然後二號也停下腳步，我彷彿看到一、二和三號都在擺出勝利的V字手勢，我們徹底打敗了...
家園被大強侵佔，母子只好牽手離開，走出大路，我突然想到可找舅父或是附近德勝餐廳的杜叔叔幫手，於是兩母子雀躍地向村子的另一邊跑...
可惜...舅父未到家...餐廳也是烏燈黑火的...
突然，杜叔叔的車子駛過，泊好車後杜叔叔看到我們兩母子，未等我開口，anson便搶先道：「杜叔叔我地屋企有曱甴丫返唔到屋企呀！」
原來anson的勇氣並未因剛才打的敗仗而退掉；
最後由杜叔叔弟弟出馬為我們復仇，不過三隻大強已畏罪潛逃，雖然大仇未報，但我們總算安全回家。

回家，anson急不及待將剛才戰況以電話告訴baba。

＊唔好問我點解送個仔去死...可能因為我明白踩曱甴並不會有生命危險的，雖然我很怕...
＊很想知道anson肯送死 X2 的背後原因。
＊第二日，我說如果再有曱甴anson可以幫手，anson說：「我都唔識...我要等baba教我點踩先識踩D曱甴」
＊如果世界上有便攜式曱甴水就好～