白雪堡壘

今年復活假期慈母尚在享受產假，所以可以帶著ANSON日玩夜玩。
已經有許多次的雪堡bbq沒有寫文，原因是食物太美味、是日忙著耍樂、個人太依賴和太賴沒有拍照...
然而今次不得不寫下，是因為有要事（！！！）發生，而呢件事，亦可算是羞家之作。

話說當日除戰士之外還有anson的孖煙囪兄弟eason，不過其實戰士們對eason絕對不陌生（尤其是米B...哇卡卡），大家一踫面便會玩得很投入，攬頭攬頸的進入忘我狀態。

喪玩至晚上，大人們雖仍圍著火爐但已陸續放低手上的燒烤叉了，突然戰士公主米B從樓下跑上來喊：「anson同eason喺樓下除左條褲啊～」
作為孖臣母親，我倆心知不妙，首先這已不是呢兩條腸粉的第一次，何況今次名副其實地在「大庭廣眾」之下，於是二人一個手拎狼牙捧一個搖著血滴子立即向房間衝！
房門打開，孖臣正在床上，幸好不是光著四片屁股，我們先請其他戰士先行離開房間，便開始對孖臣展開一場激烈談判。
孖臣靠牆站立，臣母蹲下；
E母（怒）：「你地兩個做咩事無啦啦會玩除褲既呢？」
anson（笑）：「因為我地玩緊D醜怪野囉～」
E母（續怒）：「咁多野唔玩要玩醜怪野？點解你地要咁做？上次我已經講過唔可以順便玩除褲架啦！」
eason（立正不語）
A母 (盡力扮認真）：「ANSON！MAMA係咪有講過身體上既任何地方都唔可以隨便比人睇，除左BABAMAMA嫲嫲之外任何人都唔可以，你仲記唔記得？！」
anson：「記得。」eason（點頭）
A母 (繼續扮認真）：「記得咁點解頭先會喺朋友仔面前咁做？」
孖臣不語
E母（極認真）：「係囉！你地點可以喺朋友仔面前除衫除褲？MAMA同契媽都係朋友，但你有無見過我地會除左條褲喺度玩架？！」（A母扮認真失敗->轉身失控爆笑XDDDDDDDDDDDD）
Anson偷笑，eason繼續兩眼凝視著mama。
E母（怒視A母）：「笑咩呀！我今次係好嬲架！以後唔可以再玩除衫除褲，就算扮醫生護士都唔可以，知道未？」
孖臣點頭。
然後E母要孖臣從新自己說一次今次錯什麼，以加深記憶。

上次，孖臣在房間躲在被窩玩耍，被發現時二人衣衫不整，十足十兩個被捉姦的男女....一個把衣服穿反了，一個把褲子前後調轉了...
今次，兩隻野更加在朋友仔面前露「原形」，聽說他們真有當著兩位女戰士面前脫光褲子，聽說他們還著另一位男戰士齊齊脫（！）...唉...

前排的醫生劇集中的情節，的確為年少無知的小孩留下深刻印象，尤其是那些赤裸裸的診症畫面；
雖然有邊看邊PG，但孩子創意無限，而且孖臣一向搗蛋，拍在一起威力倍增，今次終於玩大左、玩出火；
呢次之後，我有在親子浴時再向anson說教，相信E母亦有對eason下藥；往後的獨處時間，或跟其他朋友／妹妹在家遊戲時也沒有再被捉姦在床，希望他們真有緊記慈母警戒，以後做個好孩子吧！

今次要向受影響的戰士致歉，真係太失禮了...